SENABRIGU

SENABRIGU
Nha kama paseiu di rua
Fatu di gala koltxon di spuma
Ternura di friu kobertor di bruma
Korda de sol lanparina de nha palasu
Ke ta skenta-m dizeju d’ama lua
//
Na rotina de vida di mendigu
De sidadi kapital di sen abrigu
Mi ma nha grandi amigu de luta
Pa subrevivensia sai na kasa bruta
Ta prokura un "katxor kent" 
Na kontentor de sr. tenente
Pa mitiga fomi di kuitadu 

//

Oh mainhe natureza 
Es k’e vida de txeu kriston
Sen direitu nun gron de sinbron
Pa vivé sima jent na dignidad i amor

27/03/2017

SONETU RA-POZA (25)

RA-POZA
//
Arauju ku se kapuxu di rapoza
Sen konxê realidade roza
Pa lapida ilha Fantastika
Tra OLIVEIRA se laska
//
Serapions pa salva tradison
Mantê firme se kurral
Lonje di briga di sifron
//
Diferente virtual Familia
Vra lima kosta pa 100 real
Negandu DNA di projenitor
//
Ruizinhu 15 one n´andor
Ta da karta na ventomaria
Blokea sosiedade real
Se dzenvolvimentu natural
//

12/03/2017

TERRAVISTA (67)

TERRAVISTA
/

Bu-s fidje spadjod na mundu

Ta luta p'un dia amdjor

Abo n'orizont d`spiransa
Ta sprita un puema d'amor

Pa munda spinhu de bunansa 

//       

Mont Verd sinzentadu
Karranka sekâ garganta
Terra Vista na distânsia
Korason azul sentensia
//

Mor Burmedje amarelod

Lua radonda riga lensol
Bronk de jiografia de Viana 

//

Radie ka papia
Teve nen sinal
Tele sen boka
Bark na doka
Net sen sistema

Aviãu un dilema

//
Desfile de lata de pitrol
Storia urijinal de Balãu
Barra antrada na Lorg
De Santa Isabel sen sorg

//

SV, 02/02/2017