KARNAVAL OLISANTO

/

Pa karnaval, n’ultma d`ora, N rezulbe b(i)sti di resikladu

Na kabesa, N kanba un txapeu di padja jiladu

Dsima de nha kablera, N po un pustis de karakeja

Na p(i)skos, N suta un kurdon de tanpa de garrafa de serveja

I N pasa na nhas uredja un brink d` anganha Strela

Na nhas mama de bola de meia bedje, N kubri-s ku sutian de favela

Na puls, N priga un maskot/pulsera de tanpa de manekon di Fogu

N kamufla nha korp k un Bluza de junsa i Saia de sok de sarapilhera isfiod

Pa proteje pe de kalsadona de Prigisa, N kalsa alberka ku sola de pneu uzod

Na ora de Saninklau, N prezinta na juri kalol pa ”negrifika” nha imaja di kurder

Ku bala na kone de boka bedju na kol pa dfeza de nha urgudje de kabrer

//

Pa bodje de maskrinha n’Arbera Doze, N perfuma di Bilanta

N kanba tres kalsinh de pontx de let de bonbardera na garganta

D(i)pos N anxagua boka ke xa de furturadja pa mata bof

Na nha jardin de kintal, N ranka un flor de baboza

Pa N oferta nha pikena/txutxa ku kadera sima rutunda d` ASA

“Lingua de Paxaun” i kanelinha de pau/post de lus de strada di jireson

I barriga loj sima “Pimenta(un)” pizod pa kaminhants de sol kanbod

Na lixera de Murrinh de Karbon, N garda nha 4x4 puluent di pof

N munta na nha kabol de vara de xuratera tudu ruskon sima gungon

N ba na 150Km/ora sima lobu ta fuji de Plisia d` Orden Puta

///

Na sala di badju ningen ka kunxe-m na nha disfors di konkfu

N sanba Sanba na Pe, Maravilha de Sul i Gavionx, nun ton

Kulod sima xuinga na sola de sapot de sapataria Jon Xinxon

Na sabura de musinhe Sonvisentin linbro-m nha amig(u)

Uldgar de Jul d`Zinha na mund de verdad kond el taba

Da Mari Juze de Flurens kel garrotx na rabikada de fin d`anu

Na kaza Xukala o traze de kaza Tiliza d(i)pos de kel tukatina ka ti Dãu

Antis manxe, N da milia pa kaza na Forsaerea ta rima

Sima Timaninhe Karol muntod na se kabalu rus marinhu

N tma un kold d` ove de galinha de terra pa kunpo kabesa

N firra na sonu ti otu dia ta sunha na NATELIZA ambrasadu

Na lingua maternu ta skribe diskulpa di nuvenbru pasadu

Na Lingua Maternu/Kabverdian, kada gota ta kunta!

Olisanto, 21 d fevrer d 2010